sina o luka e sitelen mi ni.
sina ken lukin e ni: sitelen li suli mute.
mi jan seme?
tenpo open la, mi weka tan sijelo pi mama meli mi. tenpo ona la, jan ale li toki e ni: mi mije. mi kin li toki e ni lon tenpo sike mute.
taso, ni: mi kama suli. mi weka tan ma mama mi (ma Nijon) tawa tomo sona suli lon ma Oseja. tenpo ona la, mi ken moku e telo nasa lon ma ni.
mi la, ni: nimi “Nijon” li pona la, nimi “Nipon” li pona mute.
mi lon tomo kulupu, en mi awen lon poka ala mama tu mi. ni li sin tawa mi lon tenpo ona. mi sona mute e mi. mi toki insa mute e mi. mi esun e len meli en mi len e ona. pini pi toki mi ni la, mi jo e sona ni: mi insa li meli.
mi jo e nimi mute.
toki Nijon la, nimi mi li Haruki. ona li jo e kon ni: wan la, tenpo pi kama suli pi kasi sin la, mi open lon. tu la, mi ijo pi wile wawa pi mama meli mi tawa tenpo kama. nimi ni li nimi mije li nimi meli.
toki Inli la, mi jo wile e nimi Harry. sama jan Ali Pota (Harry Potter), mi kepeken e ilo lukin lon sinpin mi. taso, mi kama sona pi meli mi. tan ni, mi wile ala e nimi ni.
nimi mi sin li Haley lon toki Inli. ni li nimi meli, li kalama sama nimi mi lon toki Nijon. ni li sama nimi pi jan pi kalama musi uta lon kulupu Palamo (Paramore), taso nasin sitelen ona li sama ala (ona li Hayley Williams, kepeken “y” tu.).
toki Epelanto la, mi kepeken Hejli, tan kalama pi nimi mi lon toki Inli. toki pona la kin, mi kepeken “jan Eli” (jan [e li .]) tan nasin sama.
Haruki, en Haley, en Hejli, en “jan Eli” li mi. toki poka mi la, nimi ona ale li jo insa e ijo wan; ijo ni li mi.
mi olin e toki.
mi kepeken e toki Nijon e toki Inli tan tenpo open mi. mi kama sona e toki Epanjo lon tomo sona. mi kama sona e toki Epelanto lon linluwi. tenpo ni la, mi kepeken e toki ni ale.
mi kama sona e toki pona tan jan LangFocus lon lipu Jutu. mi sona mute pi toki pona.
...taso, tenpo mute weka taso la, mi kama sona e nimi “tonsi”. en mi sona ala kepeken e nimi ni. en sina sona ala e ni kin.
ijo poka li suli mute lon toki pona.
toki pona li jo e nimi pi nanpa ni: ale mute luka luka luka tu (137). (nanpa ni li sama ala tawa jan toki ale.) nanpa ni li lili mute tawa toki ante. nimi wan li jo e nasin kepeken mute, en jan toki li wile alasa e kepeken pona.
nimi li ken kepeken tan ni: ona li pana e ijo sama tawa jan ante. jan wan li toki insa lawa li sitelen insa lawa e ijo; kepeken nimi la, jan wan li ken pana e ijo e pilin e wile sama tawa jan pi sama ala. nimi li pana e ijo, tan lawa pi jan ona, tawa lawa pi jan pi sama ala.
ona ale li sama ala. taso, ona ale li tomo tawa.
kepeken ala e toki pona la, kepeken toki pona li ante. nimi pi toki ni li jo e insa suli. ona li jo e ijo mute.
lon tenpo ale la, jan kute li wile sona e ni: lon tenpo ni, jan li toki e nimi tawa mi; nimi ona ni li jo e ijo seme? jan toki li wile sona e ni: mi wile pana e wile wan tawa jan kute; nimi mi ni li pana ala pana e ijo sama tawa ona?
pilin mi la, ni li pakala. ante la, taso lon tenpo sama la, ni: pilin mi la, ni li musi. lon nasin seme la, mi ken weka e pakala ni?
sina olin mute suli e “動物” seme?
kepeken ala e toki pona la, toki ni pi wile sona li pona mute. kepeken toki Nijon: “好きな動物は何ですか？”. kepeken toki Lusi: “Какое ваше любимое животное?”. kepeken toki Epelanto: “Kiu estas via plej ŝatata besto?” ni li sama lili ni: “pilin sina la, soweli seme li pona suli?”. taso, ni li sama ale ala.
toki pona taso la: toki ni pi wile sona, en toki sona tawa toki ni, li ken ala lon toki pona. ken la, ona li olin mute suli e soweli ala; ken la, ni li waso, li akesi, li pipi, li kala, li ijo pi nimi ala lon toki pona.
toki Lusi li jo e nimi “слон”. ni li soweli ala soweli? mama ona li pana e telo walo tawa “слон” lili ona. taso, selo ona li jo ala e linja. o jo luka e nena linja ona; o pana sona e ni tawa kute suli ona: “слон” li soweli ala soweli?
lon toki sike (toki tuki tiki) la, nimi ka li jo insa e ijo ni, e jan kin. jan pi toki pona li kepeken nimi ni lon toki pona, taso nanpa pi jan ni li lili mute.
ken la, ni: mi kepeken lipu sona pi sitelen mute. lipu ni li sitelen e soweli ale, e akesi ale, e waso ale, e sama. ni taso la, mi ken toki ni pi wile sona: “lon lipu ni la, ijo seme li pona suli tawa sina?”
toki ni la, mi wile e ijo poka. toki pona taso li ken ala toki e ni.
nimi “tonsi” li pakala.
ona ale li sama ala. taso, ona ale li tonsi.
nimi “tonsi” li wile e ijo poka lon tenpo ale. tenpo mute la, ijo poka ni li lon toki ante. tenpo mute la, toki ante ni li toki Inli.
lipu ku la, nimi “tonsi” li jo insa e ijo tu tu.
ijo insa nanpa wan li ni. tonsi li jan li mije ala li meli ala. ijo insa ni li suli nanpa wan. jan ale pi toki pona li sona li wile e ijo insa ni.
ijo insa nanpa tu li ni. tonsi li mije ni: ona li tawa meli, li toki meli, li len meli; ante la, ona li pilin mije. kin tonsi li meli pi mije mute pi pilin meli. pilin mi la, ijo insa ni li ike li pakala. “tonsi nanpa wan” li mije ala li meli ala. “tonsi nanpa tu” li mije anu meli. jan tu ni li pilin ike li pilin utala tan ni: jan li ken lukin ala e kon ona.
ijo insa nanpa tu wan li ni. tonsi li jan ni: sijelo ona li mije ale ala li meli ale ala. pilin mi la, ni li pakala tan nasin sama. jan pi utala pi tawa noka li lon; nimi ona li Kasata Semenja (Caster Semenya). sijelo ona li “tonsi nanpa tu wan”; taso, pilin insa lawa ona li ni: ona li meli taso. ona li ante; taso, ona kin li meli.
ijo insa nanpa tu tu li ni. tonsi li jan ni: tenpo pi weka tan mama meli ona la, sijelo ona li mije. taso, pilin insa lawa ona li meli. kin tonsi li jan pi sijelo meli lon tenpo open, pi lawa mije lon tenpo ni. lipu mute pi jan pi toki pona li toki e ni: nasin kepeken ni li ken pilin utala tawa jan mute. pilin mi li sama. lon nasin ni, mi meli “tonsi nanpa tu tu”. taso, pilin mi la, mi tonsi ala en mi meli.
mi tu tu li kulupu tan seme? mi mute li sama ala.
kin la ni. jan li toki e nimi “tonsi” la, mi sona ala e ni: nimi ni li jo insa e ijo seme?
nimi ante la, mi sona e wile ona. ken la, sona mi li sama ala wile pi jan toki. ken la, sona mi li jo e ijo pi mute ike. taso, mi sona e ijo.
nimi “tonsi” la, mi sona ala. jan li toki e “tonsi” la, mi sona ala e ni: ona li “tonsi nanpa wan”, anu “tonsi nanpa tu”, anu “tonsi nanpa tu wan”, anu “tonsi nanpa tu tu”?
sina weka e nimi “mije” e nimi “meli” la, sina weka e pakala ni ala.
tan pakala ni la, jan mute li kepeken ala e nimi “mije” e nimi “meli” e nimi “tonsi”. nasin ni li weka ala e pakala. ni li weka taso e ken toki pi pakala ni.
kulupu suli pi jan pi toki pona la, mi meli, mi “tonsi nanpa tu tu”. taso, nasin sin ni la, mi ken ala toki e ni: mi meli. kipisi suli mi li weka. ken toki pi pilin ike suli mi li weka. nasin ni li weka e uta mi. nasin ni li wile kute ala e wile mi.
kulupu jan suli pi ma ale li jo e mije e meli. sina weka e nimi “mije” e nimi “meli” (ken la, e nimi “tonsi” kin) la, sina weka e kipisi suli mute pi pilin jan.
“meli tonsi” li meli anu seme?
mi kute e toki mute pi pilin pakala tan “tonsi nanpa tu tu” lon lipu Wesi (Reddit). mute ona li toki e pilin ni: “mi meli/mije. mi tonsi ala. mi ante ala pi meli/mije ni: meli/mije li meli/mije lon tenpo open.” pilin mi li sama.
kulupu jan li jo e poki tu taso. poki wan li mije. poki ante li meli. insa lawa mi la, mije “tonsi nanpa tu tu” li insa poki mije, en meli “tonsi nanpa tu tu” li insa poki meli.
kin la, ni: “tonsi nanpa tu tu” mute li toki ante. ona li toki e ni: “mi meli/mije. mi tonsi kin.” lukin mi la, wawa pi pilin ike tawa nimi “tonsi” pi jan tu “tonsi nanpa tu tu” li sama ala.
wile mi li ni: mi mute li weka e “tonsi nanpa tu”, e “tonsi nanpa tu wan”, e “tonsi nanpa tu tu” tan nimi “tonsi”. mi mute li toki sama e ni: tonsi li mije ala li meli ala. taso, mi kin kute e ni: “tonsi nanpa tu tu” mute li wile ala e ni, li pilin e pakala ala lon nimi “tonsi”.
poka la, jan Lipamanka li pana e pilin ike e pilin utala tawa mi. ona li “tonsi nanpa wan”. ona li toki e ni: mije pi tan tenpo open li lon insa poki mije. meli pi tan tenpo open li lon insa poki meli. taso, jan ale pi “tonsi nanpa tu tu” li lon insa poki tu ni ala.
toki ni pi jan Lipamanka li utala e pilin mi. tenpo open mi la, mi mije. ante la, ni li suli: mi meli kin. mi wile lon insa poki meli.
sama ala ni la, kin ni. “tonsi nanpa wan” mute li toki e ni: ona li “mije/meli tonsi”, anu ona li “tonsi mije/meli”. mi pilin sona ala e ni. tonsi li mije ala mije? tonsi li meli ala meli?
tenpo lili la, mi toki e lon ala. lon lawa mi la, “tonsi” li mije ala li meli ala li “tonsi nanpa wan”. ante la, “mije tonsi” en “meli tonsi” li mije anu meli li “tonsi nanpa tu tu”. ni la, mi ken pilin sona e ni.
taso, lon la, ni li nasin kepeken ala. tan ni, mi sona ala e nimi “tonsi”. sina sona ala sona e ni kin?
mi mute li weka e pakala, lon nasin seme?
pilin mi la, toki pona li wile ala e nimi “tonsi”. taso, ona li wile e nimi wan pi ni: sona sina la, sina mije anu meli anu ala anu seme? ken pi nimi “tonsi” la, nimi ni li ken mute.
mi sona ala e nimi ni lon tenpo open. mi toki insa lawa. mi toki tawa jan ante. ni li pini la, mi wile pana e nimi “pete” lon tenpo ni.
pete
jan anu ijo li mije la, mije ona li pete. ona li meli la, meli ona li pete kin. ona li tonsi la, tonsi ona li pete.
ijo li ijo pete la, ona li tawa mije anu meli anu tonsi; ken la, ijo ante li tawa pete ante.
jan li pete e jan anu ijo la, ona li toki anu pilin e ni: ni li mije anu meli anu tonsi.
sona kepeken pi wile mi
o toki ala e ni tawa pete: “ona li jo e kipisi tu; ona li mije anu meli taso.” o toki ala e ni kin tawa pete: “ona li jo e kipisi tu; ona li tonsi anu tonsi ala taso.”
nasin kepeken
- len pete: len pete li len pi mije taso, anu meli taso, anu tonsi taso. len mute li lon la, ni: ken la, len wan li mije en len ante li meli.
- tomo telo pete: tomo telo pete li tomo telo ni: mije taso anu meli taso li ken tawa lon insa ona. tomo telo pi pete ala li tomo telo ni: jan ale li tawa lon insa ona.
- tu pete: kulupu suli jan la, poki pete tu li lon. poki wan li mije en poki ante li meli. lon pi poki tu ni li “tu pete”. poki tu ni li “tu pete” kin.
- sona pete: jan li mije lon pilin ona lon lawa ona la, pilin mije en sona mije ni li sona pete. jan li meli lon ni la, pilin meli ni li sona pete kin. jan li tonsi lon ni la, pilin tonsi ni li sona pete.
- pete pi tu ala: jan li lon insa poki pete wan taso ala la, jan li tonsi. taso, ni: taso ni la, ona li jo e pete pi tu ala: sona pete ona li tu ala.
- pete nasa: jan wan li pilin pona tawa pete ona pi tu ala la, ona li ken toki e ni: “pete mi li nasa.”
- pete sijelo: ken la, pete sijelo li pete lon tenpo open pi lon ona. ken la, pete sijelo li pete lon sijelo tawa lukin pi jan ante.
- ike pete: jan li pana e ike pete tawa jan ante la, jan li ike tawa ona tan pete ona taso. jan li pilin e ike pete tawa ona la, jan li pilin e ni: “sona pete ni li sama ala pete sijelo mi.”
- jan pi pete open ala: jan li jan pi pete open ala la, ona li sona e ni: jan li pete wan e ona lon tenpo pi kama lon; taso, ona li pete ante lon tenpo ni. ante la, jan li jan pi pete open la, ona li sona e ni: ni li lon ala tawa ona.
toki mama pi nimi ni
nimi ni li tan toki Posuka (płeć /ˈpwɛt͡ɕ/). nimi ni li tan toki Tawi kin (เพศ phet /pʰeːt̚˥˩/).
mi pali e nimi ni tan seme?
- jan li kepeken nimi “mije” anu “meli” anu “tonsi” ala la, nimi “pete” li ken e toki lon mije lon meli lon tonsi.
- nimi “pete” li ken e toki lon jan ale ni: jan li mije anu meli e ona lon tenpo pi kama lon; taso, ona li meli anu mije anu tonsi. nimi “jan tonsi” li suli ike tawa wile ni.
sitelen pona
jan li ken toki pi wile sona e ni: “lipasa sina li seme?” jan li ken toki ante e ni: “mi mije.” anu “mi meli.” anu “mi tonsi.”
mi pilin e ni: toki mi kama li ken pana e pilin ike tawa tonsi mute. taso, mi toki e ni: mi mute wile ala e nimi “tonsi”.
jan li ken toki e pete ona lon nasin ni: “pete mi li mije.” “pete mi li meli.” “pete mi li ante.” mi pilin e ni: “pete” pi insa tonsi mute li pakala e “poki pete tu”; tan ni, tonsi ken toki e ni: “pete mi li nasa.” nasa li ike ala lon tenpo ale.
kin la, ni li lon. lipu ante lon lipu Wesi li toki pi wile sona e ni: “toki pona taso la: sina mije, anu meli, anu ante?” toki ante li kepeken e nimi “nasa”. mi kute e toki pi mute lili ni. jan mute (taso, ale ala) pi “tonsi nanpa wan” li pilin li toki e ni: “pete” ona li nasa.
pilin mi li ni: ken mute la, toki pona li wile ala e nimi “tonsi”. toki pona li wile e nimi pi poki tu ni anu poki ala ni.
lili suli la, o nimi tonsi ala e mi.
toki pini
mi jan pi toki pona ala. mi wile tawa insa ma pi toki pona mute la, ona li pini e tawa mi. jan pi toki pona mute li pilin e ni: mi jan ike en mi jan utala. sona mi la, jan ala li kute e wile mi. mi wile pana e telo oko tan ni.
tenpo ni la, toki pona li pona tawa mi. taso, nimi wan pi toki pona li utala tawa mi. wile mi li ni: mi ken toki e pilin insa lawa mi, kepeken nimi lili pi toki pona. wile mi li ni kin: “tonsi nanpa wan” li ken toki e pilin insa lawa ona pi ante “tonsi nanpa tu tu”.
sina kute e toki ale mi la, sina pona tawa mi. mi pilin pona tan kute sina. o tenpo sina li pona a!
jan Eli @2gd4.me tenpo sike nanpa mute ale mute luka. tenpo mun nanpa luka tu. tenpo suno nanpa mute luka luka tu wan. tenpo pi ilo tenpo la, tenpo suli nanpa luka tu tu en tenpo lili nanpa luka mute mute tu wan.
nimi `tonsi` li pakala.
ona li wan e ijo mute pi sama ala.
jan li kepeken e nimi ona tawa jan ante;
taso, ken la, jan ante li wile ala e ni.
toki pona li wile e nimi ni:
jan li ken kepeken e nimi tan wile ona.
#OPonaEMi #TokiPona #InclusiveLanguage